|
Бр. 02-283/2
8.2.2024 година
Скопје
Ректорската управа ја информира јавноста дека на вонредната седница, одржана на 8.2.2024 година, на која се расправаше за Колективниот договор на Универзитетот „Св. Кирил и Методиј во Скопје, ги донесе следниве
З А К Л У Ч О Ц И
- Колективниот договор на Универзитетот „Св. Кирил и Методиј“ во Скопје е на сила, во правниот промет се применува од 1 јануари 2024 година, не е откажан, ниту укинат или поништен, и е задолжителен за работодавачот и работниците во чие име е склучен.
- Универзитетот „Св. Кирил и Методиј“ во Скопје, со особена грижа за положбата на своите вработени и за остварувањето на нивните права од работен однос, констатира дека се целосно неосновани и незаконски наводите на Министерството за образование и наука и Министерството за труд и социјална политика, во врска со полноважноста на поединечниот Колективен договор на УКИМ, со незаконско тврдење дека не е регистриран во Регистарот на колективни договори, кој го води Министерството за труд и социјална политика. Имено, според член 231, став 1 од Законот за работните односи, регистрирање е задолжително за општи и гранкови колективни договори, а не и за поединечни колективни договори, каков што е Колективниот договор на УКИМ, за кои според став 3 од истиот член е потребно само известување до Министерството за труд и социјална политика.
- Ректорската управа на Универзитетот „Св. Кирил и Методиј“ во Скопје констатира дека државата не ги почитува актите кои таа сама ги носи, што е во спротивност со принципите на владеење на правото и правната сигурност.
- Универзитетот „Св. Кирил и Методиј“ во Скопје и Синдикатот на Сојузот на синдикати на вработените на Универзитетот „Св. Кирил и Методиј“ во Скопје бараат итна средба во рок од три дена со премиерот Талат Џафери, кој, инаку, е и потписник на Колективниот договор на УКИМ.
- Вработените на Универзитетот и Синдикатот ќе преземат соодветни мерки за заштита и остварување на своите права, загарантирани со Уставот и законите.
За непочитувањето на Колективниот договор на УКИМ, со допис од 5.2.2024 година, известени се следниве институции: Собранието на Република Северна Македонија, Владата на Република Северна Македонија, Министерството за образование и наука, Министерството за финансии и Министерството за труд и социјална политика.
Универзитет „Св. Кирил и Методиј“ во Скопје Ректорска управа |
Soopshtenie_do_javnosta_i_potpisi_KD.pdf
