Проректори | Проректор за меѓународна соработка

Проф. д-р Иван Чорбев е роден 1980 година.

Додипломските студии ги завршил на Факултетот за електротехника и информациски технологии (Компјутерска техника, информатика и автоматика) при Универзитетот „Св. Кирил и Методиј“ во Скопје, во 2004 година. Како најдобар дипломец на Факултетот, во 2005 година бил награден со престижното признание „Инженерски прстен“ (Златен прстен), доделено од Инженерската институција на Македонија. По дипломирањето, своето првично професионално искуство го градел работејќи две години како софтверски инженер во телекомуникациска компанија. Магистерските студии по компјутерско инженерство ги завршил на Факултетот за електротехника и информациски технологии (ФЕИТ) при УКИМ во 2006 година. Докторските студии по компјутерски науки и инженерство ги завршил на ФЕИТ при УКИМ во 2009 година. По завршувањето на докторските студии, реализирал студиски истражувачки престој на Техничкиот универзитет во Виена (TU Wien).

Од 2005 година, работи како наставен и научен кадар, а во моментов е редовен професор. Бил раководител на Институтот за софтверско инженерство при Факултетот за информатички науки и компјутерско инженерство (ФИНКИ) на УКИМ. Неговото меѓународно академско искуство вклучува и ангажман како визитинг-професор на универзитетот SRH во Берлин, Германија. Исто така, тој е акредитиран ментор на докторските студии на ФИНКИ и бил ментор за 5 кандидати.

На два пати бил избран да ја извршува функцијата декан на Факултетот за информатички науки и компјутерско инженерство (ФИНКИ), управувајќи со Факултетот во континуитет од 2015 до 2022 година. Во текот на своите мандати, раководел со брзо растечка институција, придонесувајќи за развојот на образовните процеси, меѓународните проекти и стратешкото позиционирање на Факултетот.

Ја извршувал функцијата претседател на Управниот одбор на Македонската академска и истражувачка мрежа (МАРНЕТ). Бил член на Одборот за акредитација во високото образование на Република Северна Македонија, како и член на Националната комисија за учебници при Министерството за образование и наука (МОН).

Активно е вклучен во развојот на иновацискиот екосистем и соработката со индустријата. Од 2019 година е член на Управниот одбор на Бизнис-акцелераторот УКИМ, каде што го претставува Универзитетот при корпоративно управување и евалуација на стартапи. Во периодот од 2018 до 2022 година, работел како експерт-евалуатор за Фондот за иновации и технолошки развој на Северна Македонија и Српскиот фонд за иновации, оценувајќи над 120 проекти. Во текот на својата кариера, развивал и имплементирал комплексни софтверски и ERP-системи за водечки стопански субјекти во регионот и светот, како и софтверски системи на национално ниво.

Проф. д-р Иван Чорбев раководел со развојот на клучните информациски системи за дигитализација на високото образование. Од 2010 година е проектен менаџер за развој на iKnow – интегрираниот универзитетски информациски систем имплементиран на повеќе јавни универзитети. Има богато искуство како меѓународен консултант за изработка на ИКТ-стратегии и спецификации за државни институции и организации (UNICEF, UNFPA, IOM, ОБСЕ, Собрание на РС Македонија, Државна изборна комисија).

Активно раководел и учествувал во реализацијата на повеќе од 20 меѓународни научноистражувачки проекти финансирани од ЕУ (Digital Europe, Horizon 2020, Horizon Europe, Erasmus+, TEMPUS, FP6, FP7).

Досега има објавено повеќе од 140 научни и стручни труда во меѓународни списанија и конференциски зборници. Неговиот научен опус ги опфаќа областите на софтверско инженерство, машинско учење, податочна наука (Data Science), телемедицина и хевристичка оптимизација. Во рамки на социјално-ориентираните проекти, го раководел развојот на образовни игри за деца со посебни потреби поддржани од USAID. Како потврда за неговиот придонес, се стекнал со статусот сениор член (Senior Member) на IEEE. Дополнително, редовно учествува во организацијата на реномираните научни конференции, каде што има вршено и функција на претседавач.

Подрачјата на негов тековен научноистражувачки интерес вклучуваат вештачка интелигенција, анализа на големи податоци (Big Data), е-здравство и системи за паметно живеење (Ambient Assisted Living).