Свечено затворање на првата годишна конференција на УКИМ

Свечено затворање на првата годишна конференција
Предавање на акад. проф. д-р Сашко Кедев: „Кон врвот“

На 4 јуни, во Ректоратот на УКИМ, во рамките на свеченото затворање на првата заедничка годишна конференција, а во организација на УКИМ и Универзитетската школа за докторски студии, извонредниот академик, проф. д-р Сашко Кедев, редовен професор на нашиот Универзитет, одржа предавање насловено „Кон врвот“. Исклучително инспиративното предавање, кое беше првенствено наменето за докторандите и нивните ментори, а кое побуди не помал интерес и кај останатите членови на академската заедница, имаше за цел да ги мотивира, охрабри и поттикне сите присутни кон стремеж за подобри и повидливи резултати и поставување повисоки животни цели.

Настанот го отвори ректорката на Универзитетот „Св. Кирил и Методиј“ во Скопје, проф. д-р Биљана Ангелова, која истакна дека голема е честа и задоволството токму академик Кедев да ја затвори Годишната конференција, која е дел од пошироката визија на УКИМ, а која за првпат се организира заеднички, преку групирање на сродните научни подрачја.

Постигнувањата на акад. проф. д-р Сашко Кедев не се само во границите на медицината, академик Кедев е и врвен планинар кој ги има искачено и највисоките светски врвови, а во 2024 г. Универзитетот го награди со престижната награда Плакета за посебен придонес за развој на научноистражувачката дејност и интернационализацијата и афирмација на Универзитетот „Св. Кирил и Методиј“ во Скопје.

На предавањето, преку инспиративната лична приказна, и од кардиохирургијата и од планинарските подвизи, акад. Кедев на присутните им ја пренесе својата дефиниција за успех: дека успехот се случува кога дејствуваме „надвор од рамките“.

Предавањето го затвори претседателката на Стручниот совет за докторски студии и проректорка за настава, проф. д-р Соња Топузовска.