Квалитет | Систем за квалитет

Системот за обезбедување на квалитет е воспоставување на стандарди, постапки и методи со цел за развој и унапредување на квалитетот и постигнување на највисоките нивоа на образовната, научноистражувачка, уметничка и применувачка, односно апликативна дејност како и во стручните и административните активности на Универзитетот.

Системот за обезбедување на квалитетот во работењето на УКИМ и единиците се остварува преку континуирано следење на исполнетоста на стандардите пропишани во Правилникот за стандардите и постапката за надворешна евалуација и самоевалуација, во согласност со  Европското здружение за обезбедување на квалитет во високото образование (ENQA).

 

Прв Форум за квалитет на УКИМ – Со квалитет до извонредност
(Платформа за дијалог, размена на добри практики и унапредување на квалитетот во високото образование)

 

Регулатива на системот за обезбедување на квалитет на УКИМ

 

В О Д И Ч за обезбедување квалитет на Универзитетот „Св. Кирил и Методиј“ во Скопје

П Р А В И Л Н И К за обезбедување на квалитет на Универзитетот „Св. Кирил и Методиј“ во Скопје

У П А Т С Т В О за самоевалуација и обезбедува­ње и оценување на квалитетот на Универзитетот „Св. Кирил и Методиј“ во Скопје и неговите единици

С Т Р А Т Е Г И Ј А за обезбедување на квалитет на Универзитетот „Св. Кирил и Методиј“ во Скопје (2024-2029)

 

Тела за обезбедување на квалитет на УКИМ

Воспоставена е нова структура, надлежна за обезбедување на квалитетот на централно ниво и на ниво на единиците.

На универзитетско (централно) ниво е воспоставен Центар за квалитет како внатрешна организациона единица. Во рамки на Центарот за квалитет функционираат Советот за квалитет и Комисијата за самоевалуација.

Центарот за квалитет на Универзитетот е внатрешна организациона единица на Универзитетот „Св. Кирил и Методиј“ во Скопје, без својство на правно лице.

Со Центарот за квалитет раководи раководител. За раководител на Центарот е избрана проф. д-р Марина Митревска, професорка на Филозофскиот факултет при УКИМ.

Раководителот ја координира работата на Советот за квалитет и Комисијата за самоевалуација,  подготвува годишен календар на активности, организира / дава иницијатива за обуки, подготвува годишен извештај за работа на Центарот, координира активности за континуирано унапредување на квалитетот и учествува во работата на Советот за квалитет.

Центарот ги планира, следи, анализира и раководи со активностите за обезбедување на квалитетот на образовната, научноистражувачката, уметничката и применувачка, односно апликативна дејност на Универзитетот.

Во рамките на Центарот за квалитет е формиран Советот за квалитет, како стручно советодавно тело за обезбедување на квалитет на Универзитетот.

Советот за квалитет е составен од девет члена, шест наставници на Универзитетот од различни научни подрачја, еден претставник од редот на студентите, еден претставник на стопанството и еден претставник на алумни заедницата.

Членовите на Советот ги именува и разрешува Ректорот на Универзитетот, освен членот од редот на студентите кој го именува и разрешува Универзитетското студентско собрание.

Мандатот на членовите на Советот трае три години со право на повторен избор, освен за членот избран од редот на студентите, на кого мандатот му трае две години.

Членовите на Советот избираат претседател на Советот од редот на наставниците, со мандат од три години со право на повторен избор. За претседател на Советот е избран проф. д-р Мишо Докмановиќ, редовен професор на Правниот факултет „Јустинијан Први“ во Скопје.

Во рамки на надлежностите на Советот е изготвување и предлагање до Сенатот на Универзитетот донесување на Стратегија за обезбедување на квалитет и ја следи нејзината имплементација, разгледување и анализа на резултатите и препораките од Извештајот на Комисијата за самоевалуација, дава мислење за Годишните акциски планови на единиците и Годишните извештаи за реализација на акцискиот план на единиците, предлага конкретни мерки за отстранување на слабостите, подготвува предлози за подобрување на стандардите, индикаторите и процедурите утврдени од Националниот совет за високо образование и донесува Деловник за својата работа.

Комисијата за самоевалуација на Универзитетот ја спроведува самоевалуација на Универзитетот, составена од девет члена.

Членовите на Комисијата за самоевалуација на Универзитетот ги избира, со тајно гласање, Сенатот, и тоа: шест членови од редот на наставниците од различни наставно – научни подрачја на Универзитетот и три члена од редот на студентите, кои ги предлага Универзитетското студентско собрание.

Мандатот на членовите од редот на наставниците трае три години, додека на студентите мандатот им трае една година.

За претседател на Комисијата беше избрана проф. д-р Јадранка Блажевска-Гилев, редовен професор на Технолошко-металуршкиот факултет.

Комисијата за самоевалуација изготвува извештај за самоевалуација, со кој е содржана оценка за состојбата со предлози за надминување на констатираните негативни појави во остварување на наставно – научниот процес и најмалку еднаш годишно го доставува до Сенатот на Универзитетот.

Во својата работа, Комисијата за самоевалуација соработува со комисиите за самоевалуација на единиците.

Во рамките на единиците на Универзитетот се формира Совет за квалитет на единицата.

Советот за квалитет на единицата е составен од пет члена, три наставници на единицата, еден студент и еден претставник на стопанството.

Членовите на Советот на единицата ги именува и разрешува деканот односно директорот на единицата, освен членот од редот на студентите кој го именува и разрешува Факултетското студентско собрание. Членот на Советот од редот на студентите од научните институти го именува и разрешува директорот на институтот.

За член на Советот од редот на наставниците  може да биде именуван наставник на единицата кој има претходно искуство во спроведување самоевалуација, евалуација или акредитација во земјата и странство.

Мандатот на членовите на Советот трае три години со право на повторен избор, освен за членот избран од редот на студентите, на кого мандатот му трае две години. Членовите на Советот избираат претседател на Советот од редот на наставниците со мандат од три години со право на повторен избор.