Home | News | 31.03.2026

Факултетот за информатички науки и компјутерско инженерство при Универзитетот „Св. Кирил и Методиј“ во Скопје одбележа 15 години од своето постоење, потврдувајќи ја својата позиција како една од водечките образовни и научни институции во државата. Во рамки на свеченоста беше промовиран и рекорден број дипломирани студенти и магистри, што претставува значаен показател за континуираниот раст, интерес и квалитет на наставно-научниот процес.

Во изминатите години, ФИНКИ изгради силна репутација преку современи студиски програми, активна соработка со индустријата и значајно учество во процесите на дигитална трансформација во општеството. Неговите студенти и дипломци се препознаени како високо квалификувани кадри кои успешно се вклучуваат на домашниот и меѓународниот пазар на труд, придонесувајќи кон развојот на технолошки напредна економија.

Јубилејот од 15 години претставува не само осврт кон постигнатите резултати, туку и поттик за понатамошен развој, иновации и зацврстување на улогата на Факултетот како двигател на знаење, технологии и општествени промени во земјата и пошироко.

Овој значаен настан ја нагласува и улогата на високото образование како клучен фактор во градењето на конкурентно и модерно општество, каде знаењето, иновациите и младите кадри се основа за долгорочен развој и напредок.

„За релативно краток период, Факултетот изгради силен идентитет и репутација, потврдувајќи дека визијата, квалитетот и посветеноста се темелите врз кои се создаваат институции со трајна вредност. Овој јубилеј не е само потврда за досегашните успеси, туку и поттик за уште поголеми достигнувања во иднина.
Факултетот за информатички науки и компјутерско инженерство, иако една од помладите членки на Универзитетот, со својата енергија, квалитет и континуирани достигнувања, се позиционира како лидер во информатичкото образование, не само во нашата држава, туку и пошироко. Неговата улога одамна ја надмина класичната наставно-научна дејност и прерасна во значаен двигател на општествените процеси, особено во сферата на дигиталната трансформација.“ – истакна ректорката на УКИМ проф. д-р Биљана Ангелова во пригодното обраќање.