Home | News | 16.10.2026

Во рамки на Деновите на Еразмус+ 2026 (Erasmus+ Days 2026), на 15 октомври во Ректоратот на УКИМ се одржа настанот „Студентски искуства од Erasmus+ мобилност“ — средба на која мобилноста оживеа низ јазик, уметност, архитектура, инженерство, истражување и технологија.

Своите искуства ги споделија Андреј Стојановски (Филолошки факултет „Блаже Конески“), Александар Бараковски (Факултет за ликовни уметности), Марија Јакимовска (Архитектонски факултет), Марија Тасеска (Архитектонски факултет), Миа Ристовска (Машински факултет), Андреа Теофилова (Машински факултет), Злате Богоевски (Факултет за електротехника и информациски технологии) и Ѓорги Андоновски (Факултет за информатички науки и компјутерско инженерство).

Секој од нив ја раскажа својата Erasmus+ приказна на автентичен начин — од стрип и читање на градот како жива училница, до искуства од комбинирана интензивна програма (BIP), докторски истражувања и прецизно структурирана технолошка перспектива.

Настанот го отвори проф. д-р Иван Чорбев, проректор за меѓународна соработка, а присуствуваа и г. Грегоар Жислер (Grégoire Giessler), директор на Францускиот институт во Скопје, Erasmus+ академските координатори и студенти на УКИМ.

Овие осум презентации покажаа дека Erasmus+ не е само патување до нов универзитет — туку можност поинаку да ја видиме својата професија, сопствениот развој и светот.
Учиме денес, ја обликуваме иднината.

#ErasmusDays2026 #ErasmusPlus #UKIM #StudentMobility #Internationalisation #StudyAbroad