Home | News | 11.11.2026

Јован Лазарев од MES Racing за инженерските предизвици, тимската работа и практичното искуство што го стекнуваат студентите

 

Зад еден тркачки болид не стојат само моторот, брзината и возачот. Зад него стојат месеци планирање, пресметки, конструирање, тестирање, грешење и бројни инженерски одлуки. Токму таков предизвик прифаќаат студентите од MES Racing (Macedonian Engineering Students Racing), студентски инженерски тим од Универзитетот „Св. Кирил и Методиј“ во Скопје, кој на практичен начин ги поврзува академското знаење и инженерството.

Во текот на 2026 година, тимот настапи на два меѓународни натпревари од серијата Formula Student, во Романија и Хрватска. Првиот настап им донесе трето место во дисциплината Autocross, додека на Formula Student Alpe Adria во Хрватска освоија петто место во дисциплината Business Plan Presentation и седмо место во Endurance, во класата CV.

Но, Formula Student не е само натпревар во брзина. Тоа е процес што започнува многу пред излегувањето на патеката и бара од студентите да ги применат знаењата од различни инженерски области, да ги оправдаат своите конструктивни решенија и да функционираат како добро организиран тим.

За предизвиците при развојот на болидот, искуството од меѓународните натпревари и значењето на ваквите проекти за студентскиот и професионалниот развој разговараме со Јован Лазарев од MES Racing, студент на Машинскиот факултет.

Formula Student не подразбира само возење на болидот, туку и технички проверки и инженерска евалуација. Што се оценува во овие дисциплини и кои аспекти беа најголем предизвик за тимот?

Еден од најголемите предизвици за нас беа техничките проверки и инженерската евалуација, бидејќи таму не е доволно болидот само да функционира. Секој систем и секоја компонента мора да бидат усогласени со правилата, соодветно документирани и поткрепени со јасна инженерска логика.

Особено значаен дел е Engineering Design, каде што треба детално да го претставиме целиот развоен процес – од почетните барања и ограничувања, преку пресметките, CAD-моделите, симулациите и изборот на материјали, па сè до валидацијата на финалното решение. Судиите со големо инженерско искуство поставуваат прашања за секоја одлука и многу брзо се гледа дали одредено решение е донесено врз основа на анализа или само интуитивно.

Токму од тие дисциплини научивме дека добар инженерски проект не се оценува само според крајниот резултат. Подеднакво важни се методологијата на развој, правилно поставените претпоставки, валидацијата, тестирањето и способноста технички да се аргументира секоја конструктивна одлука. Тоа е можеби една од највредните работи што Formula Student ни ги дава како идни инженери.

Колку учеството во MES Racing им помага на студентите да го поврзат теоретското знаење од факултетот со практичната инженерска работа и кои вештини ги стекнуваат преку проектот?

Учеството во MES Racing им помага на студентите многу полесно да го поврзат теоретското знаење од факултетот со реалната инженерска примена. На предавањата учиме за механика, материјали, термодинамика, електроника, пресметки и различни инженерски методи, а во тимот добиваме можност сето тоа да го примениме на вистински проект.

Студентите поминуваат низ целиот процес на развој – од почетната идеја и дефинирањето на барањата, преку пресметките, CAD-моделирањето и симулациите, па сè до производството, склопувањето, тестирањето и валидацијата на финалното решение. Тоа значи дека не учиме само како нешто треба да изгледа на хартија, туку и како реално се однесува кога ќе биде произведено и ставено во функција.

Покрај техничкото знаење, тимот нè учи и на работи кои се исклучително важни во професионалниот живот – работа во тим, комуникација, распределба на задачи, почитување на роковите, носење одлуки и решавање проблеми под притисок.

Во разговорите со поранешни членови на Formula Student од други универзитети, кои денес работат како инженери, често сме слушале дека преминот од тимот кон професионалната работна средина им бил многу природен, бидејќи начинот на работа, организацијата и инженерскиот процес биле многу слични. Токму затоа сметаме дека Formula Student е едно од најдобрите искуства што еден студент може да ги стекне пред да ја започне својата професионална кариера.

По овогодишните натпревари, кои се следните цели на MES Racing и што можеме да очекуваме од тимот во претстојниот период?

Следните цели на тимот се насочени кон понатамошен технички развој, подобра организација и подготовка за уште посериозни настапи на натпреварите од серијата Formula Student.

Во моментов работиме на подобрување на постојниот болид, но паралелно со тоа веќе започнуваме и со развој на следната генерација на возилото. Целта ни е секоја нова верзија да биде чекор напред во поглед на перформансите, издржливоста, масата, управливоста и целокупната ефикасност на болидот.

Воедно, сакаме уште повеќе да го подобриме процесот на тестирање и валидација, за инженерските решенија што ги развиваме да бидат поткрепени со реални податоци и мерења.

Но, нашата цел не е само да направиме побрз болид. Сакаме MES Racing да продолжи да расте како платформа преку која студентите ќе можат да стекнат реално инженерско искуство, да работат на сериозни проекти и да бидат што е можно поподготвени за професионалната кариера по завршувањето на факултетот.

Во претстојниот период може да се очекуваат многу работа, нови инженерски решенија, нови предизвици и, се надеваме, уште подобри резултати на меѓународните натпревари.

Успесите во Романија и Хрватска се значаен чекор за MES Racing, но вредноста на ваквите студентски проекти оди многу подалеку од освоените пласмани. Зад секој изработен дел, секое тестирање и секое излегување на патеката стојат знаење, посветеност и способноста теоријата да се претвори во функционално решение.

Преку Formula Student, студентите добиваат можност да се соочат со предизвици што не можат целосно да се симулираат во предавалната: да преземаат одговорност, да грешат, да бараат решенија и да ги бранат сопствените инженерски одлуки. А можеби токму во тоа е најголемата вредност на MES Racing: создавање средина во која студентите не чекаат еден ден да станат инженери, туку уште за време на студиите добиваат можност да размислуваат и да работат како инженери.

Статијата ја објавува „Авангарда“, студентски гласник на Универзитетскиот комуникациски центар на Универзитетот „Св. Кирил и Методиј“ во Скопје – виртуелен простор каде студентските идеи, предизвици и успеси добиваат глас, видливост и можност да поттикнат позитивни промени во академската заедница.